Banka Qendrore ulë projeksionin për rritjen ekonomike në 3.5 për qind

Ngërçi politik dhe vonesa e konstituimit të institucioneve do të kenë ndikim edhe në ekonominë e Kosovës. Parashikimi që ishte bërë në fillim të vitit 2014, për rritje ekonomike prej 4 për qind, nuk do të mund të arrihet.

Banka Qendrore e Kosovës e ka rishikuar këtë projeksion, duke e ulur në 3.5 për qind rritjen e pritshme ekonomike. Por guvernatori i Bankës Qendrore të Kosovës, Bedri Hamza, thotë se në ditët në vazhdim pritet të bëhet edhe një rishikim që lë të kuptohet për ulje të mundshme të rritjes ekonomike.

“Ne e kemi rishikuar, fillimisht projeksionet tona kanë qenë që rritja ekonomike të jetë ndër katër për qind, ndërsa tash në bazë të të dhënave të fundit kemi ardhur në 3.5% dhe sigurisht që më vonë presim me dalë edhe me një rivlerësim të rritjes ekonomike, por aktualisht projeksionet tona janë në 3.5 për qind”, ka thënë guvernatori Hamza… (“Koha Ditore”)
© KOHA.net