Ban Ki-moon i shqetësuar për krizën politike në Kosovë

Nju Jork – Më 14 nëntor Këshilli i Sigurimit të Kombeve të Bashkuara do të diskutojë raportin tremujor të radhës për Kosovën të sekretarit të përgjithshëm, Ban Ki – moon.

Siç merret vesh, Kosova e Serbia në këtë mbledhje do të përfaqësohen nga ministrat përkatës të jashtëm, Enver Hoxhaj e Ivica Daçiq.

Në raportin që përshkruan zhvillimet në vendin tonë nga 16 korriku deri më 15 tetor të sivjetshëm, sekretari i përgjithshëm i OKB-së Ban Ki – moon, shpreh shqetësimin për bllokadën e tejzgjatur në formimin e institucioneve dhe pasojat nga kjo.

“Jam tepër i shqetësuar për bllokadën e tejzgjatur politike në Prishtinë dhe në efektet negative që ajo mund të ketë në progresin e arritur deri më tash në zhvillimin e institucioneve dhe proceseve demokratike në Kosovë. Fuqishëm, inkurajoj të gjitha etnitetet politike në Kosovë, posaçërisht liderët e tyre që t`i intensifikojnë përpjekjet për të ndërtuar mbi zgjedhjet e 8 qershorit dhe që bllokada aktuale të tejkalohet”, ka shkruar Ban.

Raporti lavdëron Policinë e Kosovës dhe sjelljet e Bashkësisë Islame të vendit në raport me radikalizmin fetar.
Këshilli i Sigurimit diskuton çdo tre muaj zhvillimet në Kosovë./koha/