Ballkanistët koordinohen kundër abuzuesve të vizave

Vendet e Ballkanit pritet që të fillojnë hetime ndaj personave apo grupeve që stimulojnë migrimin ilegal në BE

Kërkesa e disa shteteve të Bashkimit Evropian për pezullimin e përkohshëm të vizave për disa nga vendet e Ballkanit perëndimor për shkak të numrit të madh të azilkërkuesve, ka shtyrë vende ballkanike që të marrin masa preventive për të parandaluar shkakun e rikthimit të mundshëm të vizave.

Në një takim të përbashkët që kanë pasur në Tiranë, ministrat e Brendshëm dhe të Drejtësisë të Ballkanit me përfaqësuesit e BE-së, ballkanasit kanë shprehur gatishmërinë për t’u angazhuar bashkërisht edhe me BE-në për të parandaluar migrimin ilegal në vendet e shengenit.

Komisionerja e BE-së për Çështjen e Brendshme, Cecilia Malmström e cila mori pjesë në punimet e Forumit dyditor Ministerial BE – Ballkani Perëndimor, ua shpjegoi pesë vendeve të Ballkanit për rrezikun e mundshëm të humbjes së lirisë për qarkullim pa viza në zonën shengen.

Ajo tha se vetëm brenda këtij viti në vendet e Bashkimit Evropian janë shtuar për 75 për qind kërkesat për azil nga vendet e Ballkanit perëndimor. Malmström kërkoi nga shtetet e Ballkanit për zbatimin e ligjit dhe intensifikimin e luftës kundër korrupsionit.

“Kapacitet e tyre duhen forcuar për një luftë më efikase kundër krimit të organizuar, korrupsionit dhe krimit transanacional, duke përfshirë këtu edhe hetimet financiare. Përpjekje duhen bërë për konfiskimin e aseteve kriminale. Korrupsioni është mjaft i përhapur dhe mbetet shqetësues. Ai pengon hetimin dhe luftën ndaj krimit të organizuar dhe lejon infiltrimin e grupeve kriminale në sektorin publik dhe priva”, tha ajo, citon DW.

Vendet e Ballkanit, ndërkaq miratuan një deklaratë të përbashkët duke shprehur gatishmërinë për të rritur bashkëpunimin e mëtejshëm operacional dhe shkëmbimin e informacionit me autoritetet përkatëse të vendeve anëtare të BE-së, në fushën e menaxhimit të kufirit, migrimit të parregullt, azilit dhe ripranimit në përputhje me legjislacionin.

Sipas deklaratës që doli nga Forumi i Tiranës, pritet që të fillojnë hetime ndaj personave apo grupeve që stimulojnë migrimin ilegal, si dhe do ndiqen penalisht ata që mundësojnë abuzimin e regjimit pa viza.

Po ashtu vendet e rajonit thanë se do të shtojnë kontrollin kufitare.(albinfo)