Baftiu: Gjendja në shëndetësi e rëndë, mungon edhe pambuku e injeksioni

Gjilan – Në shëndetësinë gjilanase ka shumë parregullsi, ka thënë këtë të enjten Besa Baftiu, nga Lëvizja Vetëvendosje. Sipas saj, jeta e qytetarëve po rëndohet e shëndeti i tyre nuk është as preokupim e as prioritet i udhëheqjes lokale.

“Në shëndetësi mungon edhe pambuku për injeksion. As viti 2015 nuk do të jetë në favor të shëndetit, ngase përkundër kësaj gjendje të rëndë më 2015 janë planifikuar rreth 40 përqind mjete më pak në shëndetësi dhe rreth 25 përqind për mallra e shërbime” tha Baftiu.

Kjo drejtori po funksionon me ushtrues detyre, andaj edhe ka mungesa në punë, sikurse që ka mjekë me shkollë, por që janë të papunë. Sipas saj, ka edhe ambulanca që janë të mbyllura, ka fshatra të mëdha pa mjekë, kurse edhe dezinsektimi, deratizimi dhe dezinfektimi dështoi dhe është hera e parë që kjo në Gjilan nuk është bërë.

Sipas saj edhe në Spitalin Rajonal në Gjilan gjendje është e keqe. “I vetmi investim që është bërë aty ka qenë hapja edhe e një lokali në qendrën spitalore hapja e një kafiterie dhe po investohet vetëm aty ku përfitojnë individët”, ka thënë doktoresha Besa Baftiu.

“Vetëvendosje është kundër shuarjes së drejtorisë së Shëndetësisë dhe se ajo duhet të ekzistojë edhe në të ardhmen. Se sa është e rëndësishme shëndetësia në Kosovë më së miri dëshmon e dhëna se subjektet fituese asnjëherë nuk e morën ministrinë, por atë gjithmonë ua lanë partnerëve të koalicionit”, tha Baftiu./rajonipress/