Azemi refuzon kombëtaren shqiptare

Sulmuesi kosovar, Ilir Azemi nuk dëshiron të luaj për Kombëtaren shqiptare. Anëtari i Gruerth Furthit me anë të një faksi, i ka kërkuar Federatës Shqiptare të Futbollit (FSHF) të mos e shqetësojë më sepse nuk ka ndërmend të luajë për Shqipërinë.

Shtatlarti i ka dërguar edhe një letër zyrtare që i mbyll edhe ligjërisht “derën” Shqipërisë, raporton Sport Ekspres. Por, kjo nuk është hera e parë që i thotë jo ekipi kuqezi.

Drejtoria e Ekipeve Kombëtare në Federatë është munduar të kontaktojë me lojtarin për të plotësuar dokumentacionin që ai të marrë shtetësinë shqiptare dhe për të luajtur me ekipin kombëtar dhe atë Shpresa.

Por, mirëpritjes së momentit të lojtarit, tashmë i ka ardhur “Jo”-ja zyrtare. Lojtari nuk bëhet i gjallë për të qenë pjesë e kombëtares.

Arsyet e refuzimit dhe mohimit të skuadrës kuqezi janë të paqarta. Gjithsesi, jo zyrtarisht, nga ana e drejtuesve në institucionin e futbollit, konfirmohet teza se ai ka dëshirë, ose më mirë mendon se mund të luajë me përfaqësuesen e Gjermanisë.