Azemi pret vendim pozitiv nga Gjykata Kushtetuese

Gjilan – Avokati gjilanas Halit Azemi me të gjitha shpenzimet e veta ka përfaqësuar një ankesë në emër të qytetarëve të Gjilanit në Gjykatën Kushtetuese dhe në Ministrinë e Pushtetit Lokal, për të shfuqizuar vendimin e organeve komunale që ka të bëjë me kushtëzimin e qytetarëve për të paguar bërllokun dhe ujin. Ai është optimist se ky kushtëzim do të shfuqizohet .

Halit Azemi edhe pse ka profesionin e avokatit ai kësaj radhe ka ndërmarrë një iniciativë si qytetarë për të përfaqësuar juridikisht shqetësimet e qytetarëve të Gjilanit që kanë të bëjnë me një vendim të Kuvendit Komunal për të paguar kompanitë publike si bërllok e ujë si kushtëzim për të kryer shërbimet tjera si regjistrimin e veturave etj.

Azemi tha për rajonipress se këtë iniciativë e ka marrë personalisht dhe të gjitha shpenzimet e përfaqësimit i ka mbuluar vet. “Që nga dita e parë e kam vërejtur se ky vendim është i kundërligjshëm dhe kundër kushtetues”. Azemi tha se tashmë ka marrë një përgjigje pozitive nga Ministria e Pushtetit Lokal e cila në përgjigjen e saj ka thënë se qytetarët nuk guxojnë të kushtëzohen .

Avokati Azemi tha se më herët është ankuar edhe në Gjykatën Kushtetuese të Kosovës e cila të hënën edhe ka pasur një seancë ku edhe njëherë ka mbrojtur qëndrimet e qytetarëve gjilanas kundër kushtëzimit.

Azemi tha se në këtë seancë ka marrë përkrahje të madhe nga Behxhet Shala i KMDLNJ-së, përfaqësuesi i MAPL-së dhe Ombudspersoni i Kosovës.

“Unë pres vendim pozitiv nga Gjykata Kushtetuese e Kosovës, meqë një vendim i tillë tashmë është anuluar në të gjitha komunat e Kosovës. Realisht vetëm Komuna e Gjilanit ende e ka këtë vendim të kundërligjshëm në fuqi” tha Azemi./rajonipress/