Azemi: Ditët e mira do të vijnë

Ilir Azemi shpreson që të kthehet sa më shpejtë në fushat e blerta. Në një intervistë për faqen zyrtare të klubit, sulmuesi shtatgjatë i falënderoi të gjithë ata që e kanë përkrahur në momente të vështira, duke u shprehur optimist që shpejtë do t’i thotë ‘lamtumirë’ lëndimit dhe t’i kthehet fushave të blerta.

“Kam pasur fjali motivuese dhe kjo më motivon që të kthehem edhe më i fortë. Iu jam shumë mirënjohës atyre që më mbështetën në kohëra të vështira. Unë jam duke u rehabilituar dhe shpresoj që ditët e mira të vijnë sa më shpejtë”, ka deklaruar ndër tjera Azemi.

Sulmuesi i Përfaqësueses së Kosovës nuk ka qenë në gjendje që t’i ndihmojë skuadrës së Albert Bunjakut në miqësoren e fundit ndaj Omanit, pikërisht për shkak të aksidentit automobilistik. Ai do të qëndrojë jashtë fushave të blerta deri në vitin e ardhshëm.