‘Avullohen’ 400 mijë euro, suspendohen tre zyrtarë të MSH-së

Rreth 400 mijë euro janë zhdukur gjatë viteve 2016-2017 nga buxheti i Ministrisë së Shëndetësisë e për të cilat dyshohen zyrtarë nga Agjencia për Produkte Medicionale (AKPM) dhe nga Ministria e Shëndetësisë, shkruan sot Gazeta “Zëri”.

Zyrtarët e financave në Ministrinë e Shëndetësisë, Shkëlzen Sadriu, Ganimete Gashi dhe Fatmir Kajtazi, janë pezulluar nga puna pasi dyshohet se kanë keqpërdorur rreth 400 mijë euro të buxhetit të këtij institucioni qeveritar. E për këtë rast ditë më parë kryeshefi i Agjencisë Kosovare për Produkte Medicinale (AKPM) ka suspenduar nga puna edhe shefin e Divizionit për Financa, Mendim Sojeva dhe ka dërguar në komision disiplinor drejtorin e Financave dhe të Administratës, Sejdë Tolaj.

Zyrtarët të Ministrisë dyshohen se kanë keqpërdorur fondin i cili përdoret për avance, që jepen për udhëtime zyrtare.

Ministria e Shëndetësisë përmes një njoftimi ka bërë të ditur se do të angazhohen deri në zbardhjen e rastit.

Ministri i Shëndetësisë, Uran Ismaili, ditë më parë kishte njoftuar se ka dyshime për keqpërdorime të parasë publike nga ana punonjësve të Ministrisë gjatë viteve 2016-2017.

Për këtë ai ka njoftuar edhe Policinë e Kosovës, të cilët nuk kanë dhënë informacione për arsye të mosdëmtimit të procesit hetimor.