Avokati i Popullit kërkon dorëheqjen e Enver Hasanit

Avokati i Popullit të Kosovës, Sami Kurteshi, ka thënë se nëse nuk merret parasysh kërkesa e tij për dorëheqjen e kryetarit të Gjykatës Kushtetuese, Enver Hasani, ai do të kërkoj nga presidentja Jahjaga shkarkimin e tij.

Ai këto komente i bëri në mbledhjen e Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsionit, ku u diskutua lidhur me nismën e Komisionit për ndryshimin dhe plotësimin e ligjit nr. 03/L-121 për Gjykatën Kushtetuese.

Kurteshi pretendon se ka fakte të mjaftueshme që dëshmojnë se Kushtetuesja në vendimin e mëhershëm rreth kërkesës së Avokatit të Popullit lidhur me Dekretin e Presidentes Jahjaga për vazhdimin e mandatit të tre gjyqtarëve ndërkombëtarë të Gjykatës Kushtetuese nuk ka pasur kuorum të mjaftueshëm.

Kurteshi javën e kaluar, kishte bërë të ditur se gjyqtari ndërkombëtar Robert Carolan, me 13 shkurt të këtij viti ka sjellë personalisht dëshmi që tregon se ai kishte pezulluar vetën nga procedura në rastin e cekur më lartë, raporton gazeta Tribuna.