Avokati: Dënim më të lehtë për Shaniun “pasi është shqiptar”

“Nga ana juridike është e shpjegueshme që kur dikush që ka një prejardhje kulturore tjetër të marrë dënim më të butë se një zviceran, për veprën e njëjtë .

Vrasja e dyfishtë që shqiptari sot 60 vjeçar Shani S., e kishte kryer më 15 gusht të vitit 2011 në Pfäffikon të Cyrihut, tash, kur është duke rrjedhur gjykimi i tij, është vënë edhe njëherë në fokus të medieve zvicerane. Së fundi, avokati i të akuzuarit në një prononcim të tij të bërë për emisionin “10vor10” të televizionit publik ka dalë me një ide interesante.

Prejardhjen e të akuzuarit nga një qark kulturor që ndryshon nga ky i Zvicrës, avokati do ta përdorë si argument për të kërkuar rrethanë lehtësuese për dënimin e tij. Këtë do ta bëjë në pledoajenë që pala mbrojtëse do ta ketë të premten.

“Një gjë e tillë është krejtësisht legjitime nga këndvështrimi juridik”, ka thënë për 10vor10 një jurist i pyetur nga televizioni zviceran.

Duke qenë se sipas të drejtës pozitive zvicerane, në vendimin gjyqësor duhet të merret parasysh edhe sfondi personal i të akuzuarit, atëherë edhe konsiderata për prejardhjen e tij kulturore është krejtësisht legjitime. Për këtë arsye nga ana juridike mund të jetë e shpjegueshme që kur dikush që ka një prejardhje kulturore tjetër të marrë dënim më të butë se një zviceran, për veprën e njëjtë penale, shkruan gazeta Zürcher Oberländer.

Por, ndryshe e sheh këtë çështje ndërmjetësuesja kulturore nga Winterthuri, Have Shala. Duke qenë kosovare, ajo nuk sheh në kulturën e vet të prejardhjes absolutisht kurrfarë arsyetimi për krimin (e pranuar nga ai) e të akuzuarit.

Vetëm një burrë i ligë e vret një grua, është mendimi më i shpeshtë sipas saj, i dëgjuar, edhe në rrethin e saj kulturor. Por, sipas Shalës, në këtë rast luan me siguri një rol të madh krenaria e shkelur prej burri, për faktin se e shoqja donte ta braktiste.(albinfo)