Avancohet Orkestra Frymore e FSK-së

Prishtinë – Orkestra Frymore e Forcës së Sigurisë të Kosovës, ka thuajse dhjetë vjet që është themeluar, por vetëm tani është bërë gati për marshin e parë.

“Deri më tani, ata kanë interpretuar vetëm në vend. Prej tash do të fillojnë edhe me marshime”, shpjegon Ilaz Koci, koordinator për Orkestrën Frymore të FSK-së.

Shkumbin Bajraktari, përgjegjës për Orkestrën Frymore të FSK-së, ka rrëfyer për mënyrën se si është zhvilluar ajo.

“Fillimet e kësaj orkestre janë prej vitit 2003, kur ushtria ka funksionuar si TMK. Gjatë asaj periudhe ka pasur vështirësi të shumta financiare dhe organizative. Por, me funksionalizimin e FSK-së, është punuar të ketë rregull, veprimtari dhe financim më të mirë për këtë orkestër”, ka thënë Bajraktari.

Ai ka rrëfyer se orkestra që përcjell me nota muzikore ceremonitë më të rëndësishme për shtetin, kishte zënë fill me vetëm trembëdhjetë anëtarë. Por me kalimin e viteve, numri i tyre është shtuar.

“Tani kemi arritur t’i kemi 32 anëtarë. Ndërsa, gjatë janarit do të shpallet një konkurs që të pranohen edhe tetë anëtarë të rinj, që të bëhemi katërdhjetë”, ka thënë ai.