Autostrada i ‘hëngri’ 125 milionë euro

Projekti i dytë më i madh infrastrukutoror në Kosovë. Projekti Prishtinë-Hani i Elezit kushton 600 milionë euro

Burime nga Ministria e Infrastrukturës kanë njoftuar në kushte anonimiteti për gazetën se po të kishte më shumë para në fondet e buxhetit dhe të Qeverisë së Kosovës punët e kompanisë turko-amerikane do të përshpejtoheshin shumë më tepër, e mbase punimet e tyre do të mund të kryheshin deri në fund të vitit 2016

Zyrtarë të Ministrisë së Infrastrukturë që janë mbikëqyrës të rrjedhës së punimeve të deritashme që kanë filluar para 15 muajsh dhe që janë bërë në autostradën “Arbën Xhaferi”, që do ta lidhë Kosovën me Maqedoninë, tregojnë se deri tash janë hapur 25.5 km trase të autostradës Prishtinë-Shkup, kurse mësohet se janë asfaltuar 8 km rrugë.

Ndërkaq, bëhet e ditur se vlera totale e pagesave deri më tani është 125 milionë e 374 mijë euro, kurse vlera e tërë projektit është afro 600 milion euro.

Zyrtari i lartë për Informim në Ministrinë e Infrastrukturës, Mustafë Statofci, ka sqaruar se drejtimi rrugor 6, në kuadër të rrjetit të Transportit të Evropës Juglindore, e cila lidh korridoret III dhe X në Maqedoni me Prishtinën, ka një rëndësi të veçantë ekonomike për Kosovën dhe rajonin, duke i integruar kryeqytetet e rajonit dhe qendrat ekonomike në rrjetin rajonal të transportit./kosova sot/