Aurela tërhiqet nga ‘The Voice’: Nuk dua të lëndoj askënd!

Këngëtarja Aurela Gaçe ka sqaruar në detaje arsyet e vendimit të saj për t’u larguar nga spektakli për talentë, “The Voice of Albania’. Më poshtë sjellim kumtesën e plotë të këngëtares të publikuar në Facebook:

“Jap dorëheqjen. Të isha pjesë e jurisë së ‘The Voice of Albania’ ishte aq sa e bukur, aq edhe rraskapitëse. Unë e dua punën dhe lodhjen që sjell puna. Kam 20 vjet pa u ndalur që vetëm punoj të jem e pranishme në skenë. Por, kjo lloj lodhjeje që ndjeva këtë radhë, ishte komplet ndryshe nga çdo gjë që kam provuar deri më sot”.

“Ishte lodhje psikologjike e shpirtërore. Nuk e kisha menduar aspak kur pranova ofertën. E mendova të thjeshtë, unë punoj dhe zgjedh më të mirin ose më të mirën. Por kur je përballë faktit, uhhh kuptova se nuk e përballoj dot të lëndoj dikë që ëndërron. Edhe pse karriera e askujt nuk mund të ndalojë aty, unë ndjeja një peshë shumë të rëndë në kraharor gjatë gjithë kohës”.

“Unë e di që e dua muzikën dhe jam mësuar të dal në skenë e të bëj njerëzit të ndihen mirë. Në këtë rast, unë nuk ndjeva se e bëra këtë. Lumturova vetëm një dhe trishtova shumë konkurrentë të tjerë. Punova shumë e me shpirt, por formati kërkonte çdo javë dikë… ndoshta edhe ata që nesër mund të bëhen shumë të dashur për ju”.

“Kam lindur të lumturohem me këtë që bëj, e të lumturoj sadopak ata që më duan… Nuk dua të lëndoj askënd që sapo hedh hapat e parë në skenë. E di dhimbjen e eliminimit… Më kanë eliminuar edhe mua në shumë raste… E di shijen e hidhur. Prandaj po ndaj edhe me ju vendimin që kam marrë që ditën kur mbaroi konkurrimi”.

Kujtojmë që edicionin e tretë të “The Voice of Albania” e fitoi këngëtari nga Kosova, Florent Abrashi, i cili në natën finale mposhti konkurrentët, si Sigi, Bora dhe Krenari. /Telegrafi/