Augsburgu e blen kartonin e Mërgim Berishës

Augsburgu e ka shfrytëzuar mundësinë e blerjes definitive të kartonit të Mërgim Berishës.

Lajmin e ka bërë të ditur mediumi i madh gjerman, “Sport Bild”, përcjell “Gazeta Express”.

Klubi i Bundesligës e kishte huazuar futbollistin kosovar nga Fenerbahçe vitin e kaluar.

Dhe, përfaqësuesi i ri gjerman e tregoi veten në ligën elitare të këtij vendi duke qenë protagonist tek Augsburgu.

Prandaj, ky i fundit vendosi ta mbajë gjatë lojtarin duke e blerë kartonin e tij nga Fenerbahçe për 4 milionë euro.

Por, kjo nuk do të thotë se futbollisti nga Suhareka do të mbetet në Augsburg.

Gjithnjë sipas mediumit gjerman, Berisha është i vendosur për ta bërë hapin e radhës në karrierë, ndërsa klubet e mëdha gjermane dhe ato jashtë këtij shteti kanë shfaqur interesim për të, shkruan “Gazeta Express”.

Besohet se Augsburgu është i gatshëm ta lë atë të largohet për 15-20 milionë euro.

Edhe pse Kosova po e priste qe një kohë të gjatë, Berisha e priti në fakt Gjermaninë, e cila e ftoi për ndeshjet miqësore të marsit. /Gazeta Express/