Auditorët paguhen “s’i në kohë lufte”

Punëtorët e Zyrës së Auditorit të Përgjithshëm (ZAP) po marrin më shumë shtesa, sesa paga mujore. Përveç pagës, ata po marrin edhe para për rrezikshmëri në punë, që më herët në vendin tonë këtë kompensim e kanë marrë punëtorët e UNMIK-ut, të cilët Kosovën e kanë konsideruar si vend të rrezikshëm për të punuar.

Pas një kohe, ky farë kompensimi është hequr nga administrata e UNMIK-it, e ku ajo është lënë e vlefshme vetëm për punëtorët që patrullojnë në veri të vendit. Mirëpo, edhe 14 vjet pas përfundimit të luftës këtë kompensim po e marrin punëtorët e Auditorit të Përgjithshëm të Kosovës.

Po, përveç këtyre institucioni më i lartë që merret me auditimin e institucioneve që marrin para nga arka e shtetit së fundi është kritikuar për tejkalim të shpenzimeve të planifikuara financiare për vitin 2012, dhe për mospërputhje të të dhënave, të paraqitur në raportin e tyre vjetor financiar.

Në raportin vjetor financiar për vitin 2012, i miratuar nga Komisioni për Buxhet dhe Financa, në qershor të këtij viti, të cilin e posedon gazeta “Zëri”, shihet se si kjo zyrë ka tejkaluar shpenzimet e parapara me buxhetin e vitit 2012. Si shembull, 372 euro është paraqitur paga neto mujore e një zyrtari të lartë në ZAP ndërsa i njëjti për një muaj shtesa të ndryshme ka marrë deri në 396 euro…. (“Zëri”)