ATK shpërbleu kompanitë që nuk paguan tatimet

Institucioni i cili duhet t’i ndëshkojë bizneset që nuk kryejnë obligimet tatimore, po i shpërblen ato. Administrata Tatimore e Kosovës (ATK), në tre raste u ka dhënë kontratë Operatorëve Ekonomik (OE) që ishin borxhlinj të këtij institucioni.

Auditori i Përgjithshëm në raportin e tij ka vërejtur se ATK-ja vazhdon të bëjë pagesa për shërbimet e kryera nga ana e OE-ve pa kërkuar prej tyre shlyerjen e borxheve.

Auditori vlerëson se mos mbledhja me kohë e borxheve nga ana e ATK-së në rastet ku ajo ka mundësi shton rrezikun që borxhet e tilla të vjetërsohen. ATK madje disa tatimpaguesve që ishin borxhlinj u ka lëshuar certifikata për kryerje të obligimeve Tatimore.

“Në njërin rast, tatimpaguesit i ishte lëshuar certifikata në kohën kur ky ishte në marrëveshje për kthimin e borxhit. Në vërtetim ishte theksuar që tatimpaguesi figuron si debitor por ka marrëveshje për pagesën e obligimeve tatimore dhe i përmbahet asaj. Ndaj tij ishin marrë masa si barra tatimore për mbledhjen e detyrueshme të borxhit. Ky, kishte hyrë në marrëveshje në fund të vitit 2011 për tatimin e vlerësuar 14,311 euro të mbledhur deri në këtë kohë…”, thuhet pos tjerash në raportin e Auditorit.(Tribuna)