ATK-ja mblodhi 200 milionë euro

Administrata Tatimore e Kosovës (ATK) gjatë pjesës së parë të vitit 2013 ka mbledhur mbi 200 milionë euro që janë të hyra të ATK-së nga tatimet si dhe pagesat e Trustit Pensional të Kosovës. Nga të hyrat e tatimeve ATK-ja ka mbledhur mbi 150 milionë euro, kurse të Trustit Pensional mbi 55 milionë euro.

Drejtori i Administratës Tatimore të Kosovës (ATK), Behxhet Haliti, në një intervistë për gazetën “Epoka e re” ka deklaruar se të mbledhurat janë 3.2 për qind më shumë se objektivat e planifikuara dhe rreth 10 për qind më shumë se e njëjta periudhë e vitit të kaluar. Sa i përket mundësisë që borxhet ndaj ATK-së të falen pas miratimit të Ligjit për Amnistinë nga Kuvendi i Kosovës, Haliti ka deklaruar se ATK-ja efektet e Ligjit për Amnistinë i pret kah muaji tetor.

Sipas tij, ATK-ja është e gatshme për implementimin në përpikëri të çdo lehtësimi apo procedure të re e cila del në bazë të Ligjit për Amnistinë. Ai ka bërë me dije se aktualisht borxhi ndaj ATK-së sillet rreth 220 milionë.

Sipas tij, rreth 40 % e këtij borxhi është baza tatimore, ndërsa pjesa tjetër është ndëshkime dhe interesa. /Indeksonline/