Asllani thotë se Shqipëria po funksionon mirë vetëm falë grupit

Kombëtarja e Shqipërisë ka marrë një fitore spektakolare 2-0 ndaj Polonisë të dielën mbrëma në Tiranë.

Një fitore shumë e rëndësishme e kuqezinjve që tanimë kanë bërë një hap gjigant drejt kualifikimit në Kampionatin Evropian ‘Euro 2024’.

Kristjan Asllani ishte padyshim një nga protagonistët e suksesit ndaj Polonisë, teksa bëri mjaft mirë shpërndarjen e lojës.

Mesfushori i talentuar shqiptar deklaroi se kjo Shqipëri është e fortë vetëm falë forcës së grupit.

Një ndeshje fantastike, e një skuadre të vërtetë?

“E dinim rëndësinë e ndeshjes dhe forcën e kundërshtarit. Ata u mbrojtën mirë në pjesën e parë, por gjetëm atë supergol të Asanit. Në pjesën e dytë na vunë disi në vështirësi, por na shkoi shumë mirë dhe morëm këto tre pikë”.

Vuajtëm pak, por më pas u ngritëm dhe reaguam mirë?

“E dinim që polakët kanë shumë individualitete, por u treguam më shumë skuadër nga fillimi në fund dhe më pas rezultati ishte me ne.

Grupi është arma më e fortë e Kombëtares. Si ndiheni ju lojtarët me njëri-tjetrin?
“Është e vërtetë që me këtë trajner jemi bërë një grup shumë kompakt. Rrimë shumë bashkë dhe flasim shpesh, edhe jashtë fushe. Trajneri Sylvinho ka punuar shumë për të forcuar grupin dhe jemi shumë të kënaqur për këtë”, deklaroi Asllani. /Telegrafi/