Asfaltohen katër rrugë dytësore në Lagjen e Spitalit

Gjilan – Gjatë ditës së sotme, Komuna ka asfaltuar katër rrugë dytësore në lagjen e Spitalit në rrugën “Ibrahim Pupoci” , të cilat deri më tash kanë qenë në gjendje shumë të rëndë për kalimin e qytetarëve.

Punimet i ka vizituar drejtori i Shërbimeve Publike, Sokol Haziri, i cili tha se ky është një hap përpara drejt përmirësimit të kushteve të qytetarëve.

“Po asfaltohen këto rrugë që kanë qenë të degraduara skajshmërisht me vite të tëra. Ky është një hap përpara drejt përmirësimit të kushteve të qytetarëve. Ky projekt do të vazhdoj edhe më tutje deri në përmbylljen e tij, e i cili është në kuadër të mirëmbajtjes verore. Pjesa kryesore e qytetit është përfunduar dhe kanë mbetur edhe disa pjesë të vogla të qytetit të cilat shpresoj se ditët në vijim do të përfundohen sipas afatit të paraparë”, ka thënë drejtori Sokol Haziri.

Me asfaltimin e këtyre katër rrugicave në gjatësi prej afro 1000 metrave është përmirësuar dukshëm jeta e qytetarëve të kësaj pjese të qytetit./rajonipress/