Asfaltimi me hapat e breshkës, torturohen banorët, vozitësit dhe afaristët e zonës

Gjilan – Edhe pse ishte nisur asfaltimi i një pjese të rrugës hyrëse dhe dalëse me katër korsi, Gjilan-Livoç i Ulët, e cila ka gjatësi prej mbi 3 kilometrash dhe gjerësi prej 20 metrave, kjo rrugë tashmë është bërë shumë torturuese për vozitësit, banorët përreth dhe afaristët.

Ishte paralajmëruar se më 1 korrik 2018 do të shtrohej me asfalt deri tek pompa e benzinës kjo rrugë, por me gjasë asfaltimi i kësaj pjese do të vonohet edhe për një kohë, pasiqë po punohet me hapat e breshkës.

Banorët e zonës, vozitësit dhe vet afaristët e asaj pjese janë në hall me pluhurin dhe kushtet e rënda të rrugës.

Ramadani një banor i kësaj zone tha se është bërë e padurueshme jeta. “Ka shumë pluhur i cili po depërton në shtëpitë tona. Vërtet është e patolerueshme kjo vonesë sepse rruga është dashur të kryhet shumë më herët” tha ky banor.

Ndërkaq afaristët e zonës ndihen edhe më të dëmtuar nga mos asfaltimi i rrugës. Reshati një afarist thotë se kjo çka po ndodhë vërtet është e pafalshme. “Jemi të dëmtuar skajshmërisht sepse na ka ra puna dhe kemi pengesa serioze nga pluhuri i shumtë”.

Ndryshe gjatë vizitës në terren, kreu i Gjilanit, Lutfi Haziri, ishte shprehur i lumtur që po realizohet një projekt kapital.
“Jam shumë i lumtur që sot filluam këtë projekt kaq të rëndësishëm në vlerë prej 2 milionë eurove. Zgjerimi i rrugës do të shkoj deri në qendër të qytetit, tek semaforët, e që realisht e integron në zonën urbane Livoçin e Ulët. Rruga po bëhet sipas standardeve, me zonën e gjelbër, infrastrukturën përcjellëse nëntokësore dhe ndriçimin publik”./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).