Arxhenda nga Kosova, imazhi i fushatës pro refugjatëve

Një projekt në Remscheid të Gjermanisë synon që përmes pllakateve të nxisë solidaritetin me refugjatët dhe integrimin e tyre.

Në qytetin gjerman Remscheid, po zhvillohet një fushatë për sensibilizimin e qytetarëve me gjendjen e refugjatëve. Në këtë kuadër janë shtypur dhe shpërndarë 55 pllakate të mëdhenj me pesë portrete dhe me mbishkrimin “Hier, jetzt! – Grenzen überschreiten” (Këtu, tash – t`i kalojmë kufijtë).

Vajza refugjate nga Kosova, Arxhenda, është në mesin e pesë refugjatëve, profili i të cilëve është vendosur në këto pllakate. Sikur Arxhenda edhe katër të tjerët janë njerëz që jetojnë në qendrat e refugjatëve në Remscheid.

Ky projekt synon të nxisë solidaritetin me refugjatët dhe integrimin e tyre. Iniciatorët: Marcel Haupt, Daniel Sopora und Michael Hagemann, drejtues të qendrës për kualifikim BZI, me këtë aksion duan të tregojnë se qyteti i tyre po bën diçka për refugjatët dhe se ata janë të mirëseardhur në këtë qytet.

Fushata vazhdon deri më 16 nëntor dhe pllakatet janë shpërndarë në gjithë qytetin./albinfo/