Artan Bejta, humanizëm që flet me vepra, jo me fjalë

Gjilan – Në kohën kur fjalët shpesh janë më të shumta se veprat, Artan Bejta përfaqëson një profil të rrallë qytetari, një njeri i sinqertë, me zemër të madhe, që punon dhe vepron pa zhurmë, pa retorikë dhe pa pretendime, por gjithmonë aty ku ka nevojë për dorë pune, përkushtim dhe humanizëm.

I lindur dhe i rritur në Malishevë të Gjilanit, Artan Bejta është një nga shtyllat kryesore të iniciativave qytetare dhe aksioneve vullnetare që ky fshat e bëjnë të dallohet për frymën ekipore dhe solidaritetin e rrallë. Çdo aksion në interes të komunitetit gjen tek ai një mbështetës të palëkundur dhe një organizator të heshtur, por tejet efikas.

Angazhimi i tij nuk është kufizuar vetëm në fshatin e tij. Vullnetarisht dhe pa asnjë interes personal, Artan Bejta ka kontribuar disa herë në rregullimin e oborrit të Spitalit të Gjilanit, si dhe në aksione të tjera me interes publik, duke dëshmuar se humanizmi i vërtetë nuk njeh kufij gjeografikë.

Në çdo rast, ai e ka theksuar se vullnetarët dhe donatorët janë heronjtë e vërtetë të shoqërisë, njerëz që me bujari dhe përkushtim e mbajnë gjallë frymën e solidaritetit.

Këtë mesazh e ka përcjellë edhe publikisht, duke falënderuar nga zemra të gjithë ata që kontribuojnë për të mirën e përbashkët.

Përtej angazhimit qytetar, Artan Bejta, si pronar i kompanisë “Toni – Goni”, ka dëshmuar se suksesi në biznes mund dhe duhet të shoqërohet me përgjegjësi shoqërore.

Një shembull domethënës është edhe kontributi i tij në Llashticë, ku me mjete vetanake ka vendosur llampa ndriçimi te varrezat e martirëve, një gjest dinjitoz, i respektuar dhe i vlerësuar nga banorët dhe përfaqësuesit e fshatit.

Artan Bejta nuk kërkon vëmendje, por e fiton respektin. Ai nuk flet shumë për humanizmin, por e jeton atë çdo ditë. Për këtë arsye, ai mbetet shembull i qartë se ndryshimi fillon nga individi dhe se shoqëria ndërtohet mbi njerëz që punojnë me zemër dhe përkushtim./rajonipress/