Arta Ramadani, e nominuar për çmimin alternativ të gazetarisë
RajoniPress
11:46, 14 Maj, 2014
Emërtimin “alternativ”, njëri ndër iniciuesit e tij, Peter Lokk e definon kështu: “i jashtëzakonshëm, që shfrytëzon rrugë tjera nga ato të modës, i angazhuar, kritik dhe jo populist”.
Gazetarja shqiptare e televizioneve gjermane ZDF/3Sat, Arta Ramadani është bërë e njohur me kontributet e saj në emisionin e popullarizuar “Nano” të këtij televizioni. Vitin 2012 ajo ka qenë fituese e çmimit të parë “Kausa” për gazetare që jep Qeveria gjermane.
Edhe këtë vit Arta është nominuar për një çmim në gazetari. Fjala është për çmimin alternativ gjerman të medieve që ndahet nesër, më 15 maj, në Nürnberg.
Në mesin e 186 emisioneve televizive, radiofonike, artikujve të shtypit dhe të portaleve, një juri ka zgjedhur 30 kontribute. Ato janë ndarë në pesë kategori: televizion/video, shtyp, radio, kritikë mediale dhe internet
Ky çmim jepet për të vlerësuar punën profesionale të kryer nga një këndvështrim i veçantë. Emërtimin e çmimit si “alternativ”, njëri ndër iniciuesit e tij, Peter Lokk e definon kështu: “i jashtëzakonshëm, që shfrytëzon rrugë tjera nga ato të modës, i angazhuar, kritik dhe jo populist”.
Arta Ramadani është vlerësuar me çmimin e parë “Kausa 2012” për gazetari, në kategorinë e gazetarisë televizive. Këtë çmim prestigjioz e ndan qeveria e Gjermanisë për kontributet më të mira në lëmin e gazetarisë kushtuar migracionit.
E lindur në Prishtinë në vitin 1981, Arta ka ardhur në Gjermani që në fëmijërinë e saj të hershme. Ajo ka studiuar për etnologji, politikë, medie dhe shkenca të komunikimit në Boston (SHBA) dhe Heidelberg e Mannheim.
Karrierën si gazetare e ka filluar në transmetuesin televiziv për të rinj “Sunshine Live” dhe ka kryer një numër praktikash dhe trajnimesh në televizionet si SWR dhe HR. Pastaj ka mbaruar një voluntariat (praktikë) njëvjeçare në ZDF.
Ndërsa, para se të kalonte në 3sat, Arta ka punuar si redaktore në emisionin e ZDF-së “Hallo Deutschland”.
Në televizionet ku punon, ajo ka realizuar edhe emisione speciale për aktualitetin në Kosovë.
albinfo.ch
