Arrestohet zyrtari i Agjencisë së Pyjeve në Kamenicë, dyshohet për damkosje të kundërligjshme të druve

Kamenicë – Një zyrtar i Agjencisë së Pyjeve është arrestuar nën dyshimin për keqpërdorim të pozitës apo autoritetit zyrtar në fshatin Shahiq të Kamenicës.

Sipas Policisë, gjatë patrullimit është ndaluar një kamion i drejtuar nga një qytetar kosovar, i ngarkuar me dru, për të cilat dyshohet se transportoheshin nga territori i Serbisë në Republikën e Kosovës.

Gjatë verifikimit të dokumentacionit përcjellës, autoritetet kanë dyshuar se zyrtari i Agjencisë së Pyjeve kishte bërë në mënyrë të kundërligjshme damkosjen e druve dhe lëshimin e fletëpërcjelljes.

Me vendim të prokurorit, drutë janë sekuestruar, ndërsa i dyshuari është arrestuar dhe dërguar në mbajtje. Rasti mbetet nën hetime./rajonipress/