Arrestohet shqiptari, akuzohet për 7 plaçkitje

Të riut i ngarkohen shtatë plaçkitje të kryera në mes të tetorit dhe nëntorit të vitit 2012 në Winterthur, Urdorf, Küsnacht Zürich etj.

Policia e Kantonit të Cyrihut ka arrestuar një të ri 21 vjeçar me shtetësi shqiptare për kryerjen e shtatë akteve të vjedhjes. Shuma e përfituar me këtë rast vlerësohet rreth 370 mijë franga ndërsa dëmet e shkaktuara rreth 17 mijë franga. Policia e ka arrestuar të riun më 12 qershor të këtij viti në Gjenevë, qytet përmes të cilit ai kishte hyrë ilegalisht në Zvicër.

Ndaj tij ishin bërë më parë disa fletarreste për rastet e plaçkitjeve. Të riut i ngarkohen shtatë plaçkitje të kryera në mes të tetorit dhe nëntorit të vitit 2012 në Winterthur, Urdorf, Küsnacht Zürich dhe në kantonet Aargau, St. Gallen dhe Thurgau.

Procedurën penale ndaj tij e ka ndërmarrë prokuroria shtetërore Winterthur/Unterland. I arrestuari ka sulmuar kryesisht shtëpitë familjare. Ai thyente dyert ose dritaret dhe vidhte kryesisht kompjuterë, stoli dhe para. Dy vjedhje ai i ka bërë në bashkautorësi me një person tjetër, thuhet në komunikatën e Policisë së Kantonit të Cyrihut. Ndaj bashkëpunëtorit të tij që është po ashtu nga Shqipëria dhe moshatar i të parit, është ngritur po ashtu një fletarrest. /albinfo/