Arrestohet profesori që “shiste” nota

Njësiti i hetimeve të krimeve ekonomike dhe të korrupsionit të Rajonit të Frizajt, ka arrestuar sot profesorin e fizikës në gjimnazin “Kuvendi i Arbërit”, Shukri N. 49 vjeç, nën dyshimin e bazuar për marrje të ryshfetit.

Zëdhënësi rajonal i PK-së, Agim Gashi, ka bërë të ditur se profesori i dyshuar, për t’ua përmirësuar notat, i ka kushtëzuar dy nxënës të kësaj shkolle që t’ia japin atij 50 euro.

Pas kësaj, nxënësit e kanë njoftuar policinë, e cila e ka kapur në flagrancë profesorin. Në portofolin e tij janë gjetur edhe paratë, të cilat janë konfiskuar, raporto Koha.net.

Për këtë rast drejtori i Drejtorisë komunale të Arsimit, Agim Berisha, ka thënë se para disa ditësh ua kishte tërhequr vërejtjen të gjithë drejtorëve që të jenë syçelë dhe të mos lejojnë raste të tilla, kurse veprimet e nxënësve, që kanë denoncuar profesorin e papërgjegjshëm, i ka përgëzuar.

“Ne, si drejtori, përveç ligjit që do të sanksionojë veprimin e profesorit, do të marrim masa edhe disiplinore”, citohet tw ketë thwnw Berisha.

Të dyshuarit iu është caktuar masa e ndalimit për 48 orë. /Telegrafi/

Shpërndaje.
© RAJONIPRESS