Arrestohet në Gjilan i dyshuari për lëndim të rëndë trupor, kishte sulmuar viktimën me mjet të fortë në kokë

Gjilan – Policia e Kosovës ka arrestuar në Gjilan një person të dyshuar për veprën penale “Lëndim i rëndë trupor”, i cili kishte qenë në kërkim nga organet e rendit që nga muaji maj.

Sipas raportit policor, rasti kishte ndodhur më 14 maj 2026, rreth orës 12:00, kur i dyshuari, mashkull kosovar, dyshohet se kishte sulmuar një tjetër mashkull kosovar duke e goditur me një mjet të fortë në kokë.

Si pasojë e sulmit, viktima kishte pësuar lëndime trupore dhe kishte marrë trajtim mjekësor. Ndërkohë, i dyshuari kishte arritur t’i shmangej arrestimit dhe ishte shpallur në kërkim nga autoritetet.

Pas veprimeve hetimore dhe angazhimit të njësive policore, i dyshuari është lokalizuar dhe arrestuar më 3 qershor 2026.

Me vendim të prokurorit kompetent, i dyshuari është dërguar në mbajtje, ndërsa hetimet lidhur me rastin po vazhdojnë./rajonipress/