Arrestohet i dyshuari kryesor për vrasjen e dyfishtë në Milloshevë

Policia e Kosovës, Departamenti për Krim të Organizuar, e ka nisur me sukses vitin 2015 pasi që sonte ka arritur ta arrestojë Jeton Saraqin të dyshuarin kryesor në vasjen e dyfishtë të ndodhur më 3 maj në restaurantin “Shega” në fshatin Milloshevë.

Burime të Indeksonline kanë konfirmuar se pas gati 10 muajsh në arrati, Saraqi është kapur sonte nga Policia e Kosovës. I dyshuari njihej edhe më parë për disa vepra tjera kriminale.

Në ngjarjen e rëndë që ka ndodhur më 3 maj të vitit të kaluar kishin mbetur të vdekur dy persona: Lutfi Saraqi si dhe Nazmi Gërvalla.

“Rasti ka ndodhur pasi që Jeton Saraqi kishte filluar të bëjë problem në lokalin “Shega”. Pronari i restaurantit kishte filluar t’i largonte karriget dhe të mbyllte lokalin dhe papritmas ishte sulmuar nga Jetoni me disa shokë dhe kusherinjë të tij”, e patën përshkruar ngjarjen burime të Indeksonline.

Në këtë vrasje makabre kishte mbetur i plagosur edhe pronari i lokalit “Shega”, Besim Istrefi. /Indeksonline/