Arrestime për publikimet e testeve të maturës

Publikuesi i testeve të Provimit të Maturës në rrjetin social “Facebook” tashmë ka faqen me më shumë se 5000 pëlqime. Aty nxënësit shërbehen me informacione, u është bërë thirrje nxënësve që detyrat e matematikës t’i dërgojnë aty e madje me këshillën që të mos bien “pre e disave që po postojnë pa lidhje”.

Policia ka vetëm një të dyshuar për këtë veprim, ai është arrestuar dhe më pas është liruar. I gjithë ky skandal ka përfunduar me një të arrestuar anonim dhe me testet e gatshme në duar të nxënësve. Ndërkohë që MASHT-i ka heshtur duke mos u deklaruar fare për këtë skandal. Vetë fakti se testet janë siguruar nga një individ për t’i mundësuar atij shpërndarjen në rrjetet sociale e bën të përfshihet edhe Ministria në skandal.

Policia e Kosovës ka bërë të ditur për gazetën “Zëri” se është arrestuar një person lidhur me shpërndarjen e testeve dhe më pas është liruar. “Policia e Kosovës i ka ndërmarrë të gjitha veprimet e saj konform autorizimeve ligjore dhe për këtë ka hapur rastin ndaj personit të dyshuar, i cili është arrestuar dhe më pastaj me vendim/urdhër të prokurorit kompetent është liruar”, thuhet në deklaratën e Zyrës për Informim të Policisë për “Zërin”.