Aro Muric pritet të jetë në bankë – kush do të ruajë portën ndaj Burkina Fasos, Ujkani apo Bekaj?

Përfaqësuesja e Kosovës do të përballet me Burkina Fason në ndeshjen e parë të vitit 2022.

Njëherit kjo do të jetë edhe ndeshja e parë në drejtimin e Kosovës për trajnerin francez Alain Giresse.

Por duke marrë parasysh se janë dy ndeshje miqësore në këtë muaj trajneri Giresse do t’i provojë të gjithë futbollistët e grumbulluar për këto dy takime.

Arijanet Muric është portieri më në formë i Kosovës, por ai nuk pritet ta nisë ndeshjen ndaj Burkina Fasos nga minuta e parë.

Telegrafi merr vesh që trajneri Alain Giresse i ka bërë të qartë Aros se ai do të luaj ndaj Zvicrës nga minuta e parë dhe jo sot.

Gjithsesi dy portierët e tjerë të grumbulluar janë portieri Samir Ujkani që luan me Empolin në Serie A, derisa tjetri është Visar Bekaj që aktivizohet me Tiranën në kampionatin shqiptar.

Ujkani është kapiteni i parë i Kosovës dhe sipas të gjitha gjasave ai do të startojë nga minuta e parë ndaj Burkina Fasos.

Ndërkohë Bekaj pret të ketë minuta pasi vet Giresse ka deklaruar në konferencë për shtyp se dëshiron t’i shoh të gjithë futbollistët e grumbulluar duke luajtur.

Kosova dhe Burkina Faso takohen me fillim nga ora 18:00 në stadiumin ‘Fadil Vokrri’. /Telegrafi/