Armando Sadiku i pandalshëm
RajoniPress
07:34, 5 Mars, 2017
Në pesë takimet e deritashme të këtij gjysmësezoni ka tundur rrjetat kundërshtare katër herë.. Ai dhe bashkëlojtari i tij me origjinë shqiptare Ezgjan Alioski, sot i kanë gëzuar me golat e tyre të bukur rreth tremijë tifozë të tubuar në stadiumin Cornaredo të Luganos.
Sulmuesi i kombëtares së Shqipërisë në futboll Armando Sadiku, po tregon formë të shkëlqyer edhe tek FC Lugano,anëtare e Superligës zvicerane.
Ardhja e tij gjatë këtij stinori në këtë skuadër ka larguar frikën e tiçinezve për largim nga shoqëria e më të mirëve. Ai në pesë takimet e deritashme të këtij gjysmësezoni ka tundur rrjetat kundërshtare katër herë.
Andaj adhuruesit e tij me të drejtë e konsiderojnë edhe si shpëtimtarë të të rrezikuarve.
Falë lojës së tij të suksesshme vitin që shkoi FC Vaduz i Principatës së Lieshtenshtajnit, pati siguruar vazhdimin e garave me dhjetë skuadrat më të mira të Zvicrës.
Sadiku dhe bashkëlojtari i tij me origjinë shqiptare Ezgjan Alioski, sot i kanë gëzuar me golat e tyre të bukur rreth tremijë tifozë të tubuar në stadiumin Cornaredo të Luganos.
Serinë e golave e nis që në minutën e gjashtë të takimit Armando Sadiku. Ai me një gjuajtje të pandalshme mposht portierin e voduasëve Thomas Castella, dhe kështu e çon në epërsi 1 me 0 skuadrën e tij.
Ky gol i pësuar shumëherët sikur i inatos mysafirët. Pikërisht është Benjamin Kollolli, ai i cili në minutën e 32 e shërben sikur me dorë Samuele Campo, e ai pa ndonjë vështirësi barazon rezultatin FC Lugano-FC Lausanne 1:1.
Pesëmbëdhjetë minutat e pushimit ndërmjet dy gjysmëlojëve janë minuta sugjerimesh dhe këshillash të trajnerit të FC Lugano, Paolo Tramezanni dhënë futbollistëve të tij.
Këto këshilla më së miri i zbaton në minutën e 56 Ezgjan Alioski, i cili shënon golin e dytë dhe të fitores ndaj FC Lausanne.
Me këtë fitore të shënuar tiçinezët pozicionohen në vendin e pestë të renditjes tabelore me 28 pikë të tubuara.
Kurse FC Lausanne mbetet edhe më tutje e parafundit vetëm me një pikë epërsi ndaj FC Vaduz./arif ejupi/
http://www.albinfo.ch/armando-sadiku-i-pandalshem/
