Gjilan – Nexhmedin Arifi ka thënë se përkushtim i udhëheqjes komunale ka qenë dhe mbetet përkrahja e bizneseve, si dhe ka potencuar se janë realizuar një sërë projektesh në shumë fshatra të komunës së Vitisë në rregullimin e rrugëve bujqësore.
Në Viti është mbajtur panairi i produkteve vendore me moton “T`i ruajmë vlerat tona tradicionale”, organizuar nga Grupi i Veprimit lokal, i mbështetur nga organizata suedeze “IKC” në bashkëpunim me komunën e Vitisë.
Në këtë panair u ekspozuan produkte bujqësore, ushqimore, artizanate etj. Me moton “T`i ruajmë vlerat tona tradicionale” është mbajtur panairi i dytë me radhë në Viti, ku u ekspozuan produkte vendore nga më të ndryshmet.
Pjesëmarrësit e këtij panairi, e po ashtu edhe organizatorët, janë shprehur se iniciativat e tilla të organizimit të panaireve për produktet vendore, hapin rrugën për një zhvillim më të shpejt ekonomik.
Panairin e shpalli të hapur kryetari i komunës së Vitisë Nexhmedin Arifi, i cili ka përmendur angazhimin institucional lokal dhe atij qendror në mbështetje dhe përkrahje të bujqësisë dhe zhvillimit ekonomik.
Arifi ka thënë se përkushtim i udhëheqjes komunale ka qenë dhe mbetet përkrahja e bizneseve, si dhe ka potencuar se janë realizuar një sërë projektesh në shumë fshatra të komunës së Vitisë në rregullimin e rrugëve bujqësore.
Zyrtari i lartë nga Ministria e Bujqësisë dhe zhvillimit Rural Hysni Thaqi, theksoi se me panairet e tilla, synohet ekspozimi I cilësisë së produkteve vendore dhe kjo , luan rol të madh në zhvillimin ekonomik në komunën e Vitisë.
Ai ka vlerësuar lartë punën e Grupit Lokal të Veprimit Vitia në zhvillimin e aktiviteteve të ndryshme dhe realizim të projekteve në mbështetje të bujqve dhe fermerëve të kësaj komune.
Avni Misini drejtor për Bujqësi dhe Pylltari në Viti, shprehet se panairet e tilla duhet të jenë tradicionale, me qëllim që bujqve dhe prodhuesve vendor të të gjitha fushave, tu jepet hapësirë e volitshme në ekspozimin e punës së tyre. Grupi Lokal i veprimit Vitia, i themeluar në vitin 2009, ka treguar një punë efikase në ndihmesën e planifikimit të zhvillimit të komunitetit të biznesit më të mirë, që ka treguar rezultate.
Mejdi Mulaj kryetar i rrjetit të zhvillimit rural, tha se ky rrjet është i angazhuar për mobilizimin e gjitha forcave për të bërë zhvillimin sa më të madh të viseve rurale. /rajonipress/
