Arifi: Ndërkombëtarët të përkushtuar për stabilitet në Luginë

Kryetari i komunës së Bujanocit Nagip Arifi prit sot në kabinetin e tij përfaqësuesit e ambasadës së Shteteve të Bashkuara të Amerikës në Beograd, Kevin Furi zyrtarë për të Drejtat e Njeriut si dhe Biljana Cvetkoviq Novak hulumtuese e zyrës regjionale për siguri.

Pas takimit kryetari Arifi tha se, vizita e delegacionit në fjalë në komunën e Bujanocit ishte e fokusuar rreth situatës politike dhe të sigurisë në komunën tonë, pas ngjarjeve të fundit që ndodhën në Maqedoni, pikërishtë në qytetin e Kumanovës.

Ky i fundit i njoftoi përfaqësuesit e ambasadës së SHBA-ve për situatën e sigurisë në vend, duke shtuar se nuk ka kurrfarë ndryshimi, me shpresë se nuk do të ndodhë ajo e cila ndodhi në Maqedoni.

Apeli i kryetarit Arifi për qytetarët e komunës së Bujanocit është, që qytetarët mos të bien pre e provokimeve të mundshme sepse kjo nuk i sjell të mira askujt. Delegacioni në fjalë e ka njoftuar kryetarin Arifi se ambasada e SHBA-ve është duke përcjellur për së afërmi gjendjen aktuale si të sigurisë poashtu edhe politike në Maqedoni, si dhe është e përkushtuar që në Luginë të Preshevës të mbretërojë paqa.

Nga biseda që kishte sot kryetari i komunës, ai mësoi nga mysafirët e tij se Bashkimi Evropian, ambasada e Shteteve të Bashkuara të Amerikës si dhe OSBE së bashku do të dalin me një qëndrim të përbashkët për atë që ndodhi ditë më parë në Maqedoni./BujanociNet/