Arifi: Draftstatuti i ri i Asociacionit, problematik për Kosovën

Ish-kryenegociator, Avni Arifi, në dialogun me Serbinë, ka folur për ecurinë e dialogut, për Asociacionin, si dhe për çështjen e sigurisë në vend e rajon.

Arifi ka thënë drafti i statutit të Asociacionit që e ka publikuar Burim Ramadani është i vërteti. Sipas tij, ky draft-statut është tejet problematik për Kosovën

“Ky draft është origjinali. Këto janë elementet me të cilat do të përballemi. E dimë se Qeveria e Kosovës në parim e ka pranuar, por pala serbe nuk e ka nënshkruar për shkak të zgjedhjeve atje”, deklaroi Arifi në RTK.

Ai shtoi se ky është një obligim i ri që Kosova ka marrë përballë bashkësisë ndërkombëtare . Sipas tij, Kosova pasur shanse të mira që vetë të bëjë statutin e Asociacionit, që nga janari i këtij viti.

“Por Qeveria e Kosovës, qoftë për popullizëm, qoftë për ide të tjera, shpikte ide të tjera dhe nuk e bëri draft-statutin. E në vend që ta bënim ne e bënë ndërkombëtarët”, deklaroi Arifi.

Ndërkaq Arifi theksoi se në të kaluarën në dialogu pikë orientimi ishte arritja e marrëveshjes përfundimtare, e jo siç është tash në normalizimin e raporteve mes të dy vendeve.