Arifi: Arritja e marrëveshjes për njohjen reciproke të diplomave hap i rëndësishëm për rinin e Luginës

Është arritur marrëveshja për njohjen reciproke të diplomave, kështu që kjo marrëveshje përfshinë të gjitha nivelet universitare (Bachellor, Master dhe Doktoratë), diplomat e shkollave të mesme, arsimin profesional, si dhe nivelin e pestë të kualifikimeve. Me këtë marrëveshje palët u zotuan për njohjen reciproke të diplomave si dhe respektimin e procedurave dhe afateve sipas legjislacionit respektiv të secilit shtet.

Kryetari i komunës së Bujanocit Nagip Arifi këtë marrëveshje e vlerëson si të rëndësishme me theks të veçantë do të ndihmojë popullatën shqiptare të Luginës së Preshevës të cilët kryesisht studimet e tyre i kryejnë në institucionet e arsimit në Republikën e Kosovës dhe të cilët kanë nevojë të kthehen dhe të shërbejnë në vendet e tyre për të ndihmuar në zhvillimin e komunitetit shqiptarë në Luginë dhe shoqërisë në përgjithësi.

Dje kryetari Arifi kishte patur një takim në orët e vonshme të pasdites me një anëtarë të delegacionit i cili ka qenë i palës kosovare në Bruksel dhe e ka njoftuar për arritjen e kësaj marrëveshje.

Sipas kryetarit Arifi, është një punë e mirë që përveç arritjes së marrëveshjes për njohjen reciproke të diplomave, qeveria e Republikës së Kosovës pikërisht Ministria për Arsim ka aprovuar një urdhëres administrative që në fillim të këtij muaji të pranohen të gjitha diplomat. Kjo marrëveshje, sipas Arifit, i jep fund periudhës së dështimit të njohjes së diplomave universitare nga ana e Serbisë, dhe kërkon që brenda afatit prej pesë muajsh të njihen të gjitha diplomat e çertifikuara nga ana e Asociacionit të Universiteteve Evropiane në një numër prej mbi 400 diploma të çertifikuara të cilat Serbia ka dështuar t`i njoh deri më tani. Po ashtu, me këtë marrëveshje përcaktohet mekanizmi mbikëqyrës i procesit të zbatimit të marrëveshjes që përbëhet nga tre palët (pala e Kosovës, BE-së, dhe Serbisë) dhe që ka obligim të raportojë, vlerësoj dhe përmirësoj sipas nevojës procesin e zbatimit të marrëveshjes.

Kryetari i Bujanocit thotë se, “Qeveria e Kosovës gjithmonë ka qenë e shqetësuar dhe në vazhdimësi ka raportuar për pengesat e vëna nga ana e Serbisë popullatës shqiptare në Luginën e Preshevës në këtë aspect” .

Po ashtu kryetari Arifi vlerëson si një të mirë në takimin për diplomat që ministrat Tahiri dhe Bajrami, shtruan çështjen e shpërndarjes së teksteve shkollore për Luginën e Preshevës dhe kërkuan ndihmën e BE-së që dërgesa e Ministrisë së Arsimit Shkencës dhe Teknologjisë të zhbllokohet dhe të dërgohet tek studentët. Pala serbe mori obligim që brenda dy ditësh të jap përgjigje për këtë çështje.

Ndërsa delegacioni i Kosovës konfirmoi zbatimin e reciprocitetit për këtë çështje./BujanociNet/