Ardit M. dënohet me 13 vjet burg për tregti me drogë dhe falsifikim dokumentesh

Ai është përgjigjur para gjykatës në Olten-Gösgen për shkelje të ligjit mbi narkotikët, falsifikim dokumentesh dhe bartje armësh pa leje.

Ardit M*., një shqiptar i ri me prejardhje nga Kosova është përgjigjur para gjykatës në Olten-Gösgen, i akuzuar për shkelje të ligjit mbi narkotikët, falsifikim dokumentesh, bartje armësh pa leje është dënuar me 13 vjet burg. Prokurori kishte kërkuar dënim me 14 vjet burg ndërsa avokati i të gjykuarit, 5 vjet, shkruan solothurnerzeitung.ch.

Arditi akuzohej konkretisht për shitje të 42 kilogramëve të përzierjes së heroinës. Por, duke qenë se gjykata nuk ishte e sigurt për sasinë e heroinës, kosovari u akuzua për shitjen e “vetëm” 33 kilogramëve të përzierjes së heroinës, transmeton albinfo.ch. Veç kësaj, atij gjykata i ngarkon pagesën e shpenzimeve të gjykimit që është një shumë prej 65000 frangash.

Arditi është liruar nga akuza për pastrim parash, për të cilën akuzohej.

Ai kishte mbajtur rolin e shefit në grupin e tregtisë me heroinë e cila kishte si qendër lokalin e atëhershëm të tij, “Cafe Alexander” në Trimbach. Disa nga anëtarët e grupit tashmë janë dënuar.

Ndërkohë që kosovari e kundërshton vazhdimisht pozitën që i ngarkohet në grupin e drogës, ai ka pranuar falsifikimin e dokumenteve dhe mbajtjen e armëve. Ai ka poseduar dy revole dhe një kallashnikov, transmeton albinfo.ch. Veç kësaj ai kishte falsifikuar pasqyrën e të ardhurave të kompanisë së tij në mënyrë që përmes saj të mund ta blinte me leasing një BMW. Por ai gjithashtu e kundërshton me këmbëngulje akuzën për pastrim parash, një akuzë për të cilën edhe nuk ka pasur dëshmi të mjaftueshme.

*Emri i shifruar

http://www.albinfo.ch/ardit-m-denohet-13-vjet-burg-per-tregti-droge-dhe-falsifikim-dokumentesh/