Gjilan – Trajneri i Dritës, Ardian Nuhiu, në konferencën për gazetar, para ndeshjes finale kundër Llapit, ka thënë se ekipi i tij është gati për finalen e Kupës së Kosovës. Nuhiu ka shtuar se do të mundohen t’i shfrytëzojnë pikat e dobëta të Llapit.
“Është ndeshje futbolli, i kemi marrë masat. Kam besim te skuadra, gjithçka që kemi përgatitur do t’i nxjerrim në fushë. Kemi përballë skuadër të shkëlqyer. Do të mundohemi t’i shfrytëzojmë pikat e dobëta të kundërshtarit. Do të mundohemi të jemi vetvetja. Skuadra jonë ka dëshirë që ta ketë topin, kur nuk e kemi, do të mundohemi ta fitojmë sa më shpejt. Skuadra është e plotë, gati për të dalë në fushë. Duam të shkruam historinë, për Intelektualët, për stafin, për të gjithë”, ka thënë Nuhiu.
Trajneri Nuhiu, tha se e ka parasysh se përballë do ta ketë skuadrën me sulmin më të mirë këtë edicion. “Skuadra e Llapit, në mos gaboj, është skuadra që ka shënuar më së tepërmi. Kanë sulm të rrezikshëm. Por edhe ne kemi shënuar mjaft. Kjo ndeshje do përqendrim dhe besim maksimal, sepse është vetëm një ndeshje. Jemi të përgatitur për gjithçka, qoftë vazhdimet apo penalltitë”, u shpreh ai.
Drita dhe Llapi do të takohen nesër(e enjte), ne stadiumin “Fadil Vokrri” në Prishtinë. Ndeshja fillon nga ora 20:00./rajonipress/
