Arbnor Morina: As futbollistët e as trajnerët nuk e udhëheqin politikën e klubit

Gjilan – Mos marrëveshjet brenda klubit të Gjilanit dhe grupacionet e bëra në dy pjesë ka bërë që disa tifoz të KF Gjilanit “Skifterat” të shprehin pakënaqësinë e tyre ndaj politikës së klubit e cila po udhëhiqet.

Ata sot kanë ndërprerë edhe stërvitjet e futbollistëve duke kërkuar largimin e menjëhershëm të kryesisë aktuale në KF Gjilan.

Njëri ndër trajnerët më cilësor në futbollin e Kosovës trajneri aktual i KF Gjilanit Arbnor Morina i cili në opinionin futbollëdashës të Kosovës njihet si njëri ndër trajnerët me transparent që kemi.

Lidhur me gjendjen e sotme të ndërprerjeve të stërvitjeve Morina theksoi. “Ne sipas planit tonë sot kemi pasur të stërvitemi, por për arsyet e njohura zhveshtoret ishin të mbyllura nga simpatizuesit e klubit, ne e diskutuam me ta dhe nuk na mbeti tjetër pos të vijmë të hënën dhe të shohim se çka do të bëhet brenda 48 orëve”.

Morina thekson se futbollistët e kanë për detyrë të luajnë ndërsa trajneri t`i udhëheqë ata në sfidat e tyre. “As unë e as futbollistët nuk e udhëheqim politikën e klubit, janë tjerë njerëz që udhëheqin klubin ne jemi argatë të tyre por kjo çka po ndodhë nuk i ka hije KF Gjilanit dhe shpresoj që përfundimisht do të arrihet stabilizimi i klubit”.

Morina i cili është një njohës i mirë edhe i futbollit Evropian ka një porosi për të gjithë.
“Të gjitha këto janë kalimtare, ka hidhërime e pajtime ka ardhje e largime të kryesive të ndryshme e donatorëve të ndryshme, por kuptone një se simpatizuesit dhe klubi do të mbeten të përhershëm, kisha bërë apel edhe në emër të futbollistëve që çështja të zgjidhet sa më shpejt në këtë mënyrë vetëm klubi shkatërrohet”, ka porositur trajneri Arbnor Morina./rajonipress/