Arbër Bullakaj zgjidhet nënkryetar kantonal i SP-së dhe nominohet për deputet nacional

Arbër Bullakaj, këshilltar në Asamblenë e Qytetit Wil të Kantonit të St. Gallenit, sot është zgjedhur në dy poste të reja. Në të vërtetë ai është nominuar për deputet nacional nga kjo parti dhe njëherësh është zgjedhur nënkryetar i Partisë Socialdemokrate (SP/PS) të Kantonit St. Gallen.

Në mbledhjen e SP-së së këtij kantoni që është mbajtur sot në Wattwil, në rend dite ka qenë nominimi i kandidatëve të kësaj partie për Parlamentin Nacional nga ky kanton dhe zgjedhja e nënkryetarit të partisë në nivel kantoni.

Arbër Bullakaj, që është bërë i njohur për aktivitete të shumta shoqërore, që tejkalojnë pozitën e tij prej këshilltari të asamblesë së komunës, ka qenë kandidati i vetëm për nënkryetar.

“Jam zgjedhur njëzëri dhe pa asnjë votë kundër”, pohon Bullakaj për albinfo.ch.

Ndërkohë që propozimi i tij për nënkryetar partie të nivelit kantonal ishte shpallur publikisht më parë, futja në listën e kandidatëve për Dhomën Nacionale të Parlamentit të Zvicrës është sihariqi që ai e ka ndarë me lexuesit e albinfo.ch, e cila e ka përcjellë veprimtarinë e tij që nga fillimi.

Me nominimin për deputet nacional, për zgjedhjet që mbahen në tetor të këtij viti Arbër Bullakaj bëhet shqiptari i dytë i propozuar për këtë nivel, pas Blerim Bunjakut nga partia EVP, në Winterthur, në kantonin e Cyrihut.

albinfo.ch