Arben Dërmaku emërohet nga Buja rektor i përkohshëm i Universitetit të Gjilanit

Gjilan – Me nënshkrimin e statutit të përkohshëm të Universitetit të Gjilanit, nga ana e Ministritë të Arsimit dhe Shkencës, Ramë Buja, ushtrues detyre i Rektorit të Universitetit të Gjilanit do të jetë kryetari i Këshillit Themelues të Universitetit të Gjilanit, Arben Dërmaku.

Këtë detyrë Arben Dërmaku i cili e ka titullin (prof.dr), do ta kryej deri në konstituimin e organeve të rregullta drejtuese të Universitetit.

Ndërkohë në mbledhjen e pestë të Këshillit themelues të Universiteti është marrë vendimi që së shpejti të hapet konkursi për pozitën e Sekretarit të Përgjithshëm të Universitetit të Gjilanit dhe stafit tjetër mbështetës.

Aktualisht në këtë Universitet po punohet në përgatitjen e hapësirave të reja për t’i pritur gjeneratën e parë të studentëve me 1 tetor.

“Jemi të bindur se, me punën që po bëhet, me një tetor do të jemi të gatshëm ta presim gjeneratën e parë të studentëve dhe me sukses të plotë do ta nisim rrugëtimin e këtij tempulli të ri të dijes” tha ud. i Rektorit të Universitetit të Gjilanit, Arben Dërmaku./rajonipress/