Aprovohen dy vendime për këmbim pronash në Gjilan

Gjilan – Në seancën e jashtëzakonshme të Komunës së Gjilanit, seancë kjo e fundit para pushimeve verore, janë miratuar dy vendime, për lejimin e këmbimit të pronës së paluajtshme komunale me pronë të paluajtshme private për ndërtimin e objektit të shkollës fillore në fshatin Shurdhan dhe vendimin për ndërrimin e destinimit të dy ngastrave kadastrale, njërën në lagjen “Avdullah Presheva” dhe tjetra në “Porodin”.

Kryesuesi i Kuvendit, Izmi Zeka, ka thënë se janë dy pika të diskutimit për interesin publik të cilat duhet të marrin miratimin e Kuvendit për të filluar punën në teren sepse është në pyetje ndërtimi i një shkolle në brezin kufitar dhe pika tjetër që ka të bëjë me hapjen e rrugës për zbatimin e planit urbanistik.

Ndërsa kryetari i Komunës, Qemajl Mustafa ka thënë se edhe pse janë dy vendime për këmbim dhe ndërrim të destinimit, natyra dhe qëllimi i këtyre vendimeve është emergjent, sepse në rastin e parë kemi konfirmim të një investimi të jashtëm për ndërtim të shkollës dhe duhet që kuvendi të jap lejen për ndërrim të pronës me komunën.

Rasti i dytë ka të bëjë përsëri me një interes publik, pra hapjen e mundësisë së zbatimit të planit urbanistik në qytet më konkretisht prapa xhamisë së Medresesë dhe tek “DON BOSKO”.

Mustafa tha se për rastin e parë për ndërtim të shkollës në Shurdhan, Kuvendi i Komunës ka marrë vendim për shpronësim të tokës dhe kompensim me mjete financiare, mirëpo pasi këto mundësi të Komunës nuk janë të mjaftueshme në këtë moment, është parë e arsyeshme që të nisim procedurën e këmbimit të pronave me pronarin e ngastrës kadastrale në fshatin Shurdhan. “Pra japim tokë – marrim tokë, për interesin e qytetarëve të Gjilanit. Vlerësimin e saj e bënë komisioni adekuat për vlerësim të pronave në Ministrinë e Financave i cili ka rekomanduar që të merret një pëlqim për këmbim të pronave prej Kuvendit të Komunës” ka shtuar Mustafa.

Ndërsa në sqarimin e juristit, Sali Fazliu, nga Drejtoria e Kadastrës, i cili e ka njoftuar Kuvendin se për rastin e parë të këmbimit të pronave, që është fjala për mbi 69 ari tokë, që do të merren në fshatin Shurdhan ka qenë rekomandim i Komisionit Evropian që të gjitha proceduarat e këmbimit të pronave të kryhen deri më 10 Gusht 2013.

Përderisa mbështetje këtyre dy pikave u kanë dhënë shefi i Grupit të Këshilltarëve Komunalë nga radhët e PDK-së Ejup Haziri, AAK-së Sokol Haziri dhe AKR-së Arben Maliqi, në anën tjetër Arben Mehmeti nga LDK-ja ka thënë se veprimi i parë nuk ka bazë ligjore dhe se forma e këmbimit po shkel procedurën ligjore.

Ai poashtu ka thënë se nuk kanë material të bollshëm e të detajuar si këshilltarë komunal për të marr vendime të lehta dhe të drejta.

Shefi i këshilltarëve të PDK-së Ejup Haziri, i ka dhënë mbështetje votimit për t`i hap rrugë ndërtimit të shkollës nga një investim i jashtëm, ndërsa për rastin e dytë ka kërkuar disa plotësime teknike, duke kërkuar nga të gjithë kolegët e tij këshilltarë, që t’i votojnë këto dy pika me interes publik.

Kurse nga radhët e AAK-së Sokol Haziri, ka thënë se kur është fjala për investime nga jashtë dhe kur investimet janë në interes të publikut, nuk duhet që të hezitojmë, sepse ky është interes i qytetarëve të komunës sonë, ndërsa sa i përket proceduarave përgjegjësia bie mbi iniciuesin dhe sponsorizuesin e vendimit.

Edhe Arben Maliqi nga AKR i ka dhënë mbështetje dhe e ka përshëndetur këtë investim të duhur e të domosdoshëm për një fshat nga brezi kufitarë.

Për vendimin e parë kanë votuar pro edhe LDK, ndërsa për të dytin ishin kundër, por me shumicë votash kanë kaluar që të dy propozim-vendimet./rajonipress/