Aplikimi për statusin e kandidatit në BE, qëllim i Mustafës

Qeveria e Kosovës ka vënë lart në agjendën e vet procesin e integrimit evropian, ku si qëllim kryesor strategjik gjatë mandatit katërvjeçar paraqet aplikimin për statusin e vendit kandidat.

Me gjithë problemet e mëdha të brendshme, të evidencuara edhe në raportet që vijnë nga Brukseli, sipas asaj që thuhet në draft- program, Qeveria do të jetë e përkushtuar në nënshkrimin, formalizmin dhe zbatimin sa më të shpejtë të MSA-së, në mënyrë që Komisioni të vlerësojë pozitivisht zbatimin dhe Kosova përfundimisht të marrë statusin e vendit kandidat, shkruan sot Koha Ditore.

Në funksion të kësaj, Qeveria e Republikës së Kosovës zotohet për zbatimin e vazhdueshëm të reformave të nevojshme në fusha të ndryshme, si: sundimi i ligjit, reformat në administratën publike, zhvillimin ekonomik, mbrojtjen e të drejtave të njeriut etj.

Nënshkrimi dhe formalizimi i MSA-së do të jenë prioritet afatshkurtër i Qeverisë së Kosovës, i cili parashihet të finalizohet gjatë vitit 2015.