Aplikimi për anëtarësim, Costa: Në fund të këtij procesi s’do të ketë problem nga ana e BE’së, Kosova të përmbushë zotimet

Presidenti i Këshillit Europian, Antonio Costa, në një konferencë për media në Prishtinë, të cilën e mbajti vetëm nga Zyra e BE’së, u pyet për aplikimin e Kosovës për anëtarësim në Bashkimin Europian dhe arsyet se pse dosja e saj s’u trajtua nga Unioni.

I pyetur nëse faji është te jostabiliteti politik në Kosovë apo mungesa e unanimitetit brenda BE’së, Costa tha se “çdo problem në kohën e vet”.

Ai tha se Kosova duhet të përmbushë zotimet e saj dhe duhet të qëndrojë në rrugë drejt këtij synimi.

“Ne jemi pajtuar për agjendën e reformave, jemi pajtuar për procesin e anëtarësimit në Bashkimin Europian dhe është shumë e rëndësishme që Kosova t’i përmbushë, hap pas hapi, ato për të cilat tashmë është rënë dakord. Unë jam i bindur se në fund të këtij procesi nuk do të kemi asnjë problem nga ana e Bashkimit Europian. Por, për momentin, ajo që na duhet është që konsensusi i gjerë kombëtar për anëtarësimin europian që të mund të përkthehet në veprime konkrete dhe të arrijmë ta mbajmë një rrugë të qartë drejt realizimit të këtij zgjerimi për Kosovën”./Express/