Apel i rëndësishëm i policisë së Gjilanit

Gjilan – Për shkak të reshjeve të borës gjatë ditës, shumica e rrugëve në rajonin e Gjilanit janë vështirësuar për lëvizje të automjeteve thuhet në apelin e policisë së Gjilanit.

Për momentin rrugët janë të kalueshme, por nëse vazhdojnë reshjet edhe në orët në vijim, ka mundësi që lëvizja nëpër rrugët magjistrale dhe ato rajonale të vështirësohet edhe më tepër.

Vështirësi më të mëdha ka në magjistralen Gjilan – Prishtine afër fshatit Llabjan dhe rruga për Novo Bërdë.

Përkundër angazhimit të kompanive për pastrimin e borës nga rrugët, reshjet e pandërprera nuk po lejojnë të pastrohen rrugët për një lëvizje më të sigurtë.
Apelojmë te qytetarët që nëse planifikojnë të lëvizin me vetura, t`i kenë të vendosura pajisjet e nevojshme për kushte të tilla të rrugëve si gomat e dimrit dhe zinxhirë si dhe të kujdesen për shpejtësinë dhe shikueshmërinë në rrugë thuhet në apelin e policisë së Gjilanit të dërguar nga nënkolonel Shaban Azizi./rajonipress/