Antikorrupsioni nis hetimet ndaj milionerëve

Deklarimi i miliona eurove pasuri nga zyrtarët e lartë publikë nuk do të mbetet vetëm në formularët që Agjencia Kundër Korrupsionit i ka publikuar në uebfaqen e vet. Ky institucion ka angazhuar tashmë gjithë kapacitetet e veta për t’i hetuar milionat e deklaruar nga zyrtarët e lartë publikë. Nëse ndonjëri nga zyrtarët ka të regjistruar pasuri dhe nuk e ka deklaruar në AKK, do të denoncohet për vepër penale në prokurori nga ana e Agjencisë.

Drejtori i AKK-së Hasan Preteni, ka konfirmuar për Tribunën se faza e hetimit ka ardhur pasi agjencia ka përfunduar procedurat për publikimin e pasurisë së deklaruar.

Ai ka thënë se në këtë drejtim do të shfrytëzohen të gjitha kapacitetet e mundshme për të vërtetuar nëse ndonjë nga zyrtarët e lartë publikë ka deklaruar rrejshëm pasurinë.

“Tash pas publikimit të formularëve të pasurisë, zyrtarët tanë fillojnë analizat apo hetimet dhe në qoftë se hasim në dyshime apo gjejmë mospërputhje në deklarimin e pasurisë nëpër vite, ne i dërgojmë vetë ato raste në prokurori. Nëse gjejmë deklarime të rrejshme ose prova që dëshmojnë se ndonjë zyrtar nuk e ka deklaruar pasurinë komplet, atëherë ne i procedojmë si vepra penale nëpër prokurori”, ka thënë Preteni.(Tribuna)