Gjilan – Ansambli i këngëve dhe valleve “Gjilani” është paraqitur në mënyrën më profesionale dhe dinjitoze në Festivalin Çamërina, të mbajtur në Sarandë, të cilin morën pjesë ansamble nga e gjithë hapësira shqiptare thotë Nehat Ferati kryetar i ansamblit.
Ansambli “Gjilani” në këtë ngjarje kulturore është paraqitur me këngë e valle, doke dhe zakone autoktone nga treva e Anamoravës dhe Karadakut, të luajtura nga valltari i mirënjohur Rifat Idrizi dhe grupi i valltarëve, të përcjellë nga orkestra e ansamblit dhe udhëhequr nga mjeshtri i madh gjilanas, Murat Ismajli.
Gjithashtu ky ansambël u përfaqësua me dinjitet nga grupi i këngëtareve i përberë prej Afrim Hazirit, Arbresha Hajdari, Adnan Leka dhe Nehat Ferati.
Përfaqësuesit e Ansamblit mendojnë se juria “Profesionale” nuk ka qenë në nivel të detyrës për shkak të vlerësimeve pa kriter, kështu që mendojmë se këto festivale duhet të jenë revyale sepse për vlerësimin e këtyre programeve vërtet duhet të jenë shumë të paanshëm dhe profesionist të vërtet, pasi që mund të ndikoj negativisht në kultivimin dhe ruajtjen e vlerave kombëtare.
Organizimi i Festivalit dhe mikpritja ishin të jashtëzakonshm tha Ferati./rajonipress/
