Ansambli “Gjilani” pasuron manifestimin tradicional “Java kulturore shqiptare”

Gjilan – Ansambli i Këngëve dhe Valleve “Gjilani”, mori pjesë në “Java Kulturore Shqiptare Kumanovë 2016”. “Java Kulturore Shqiptare” është Manifestim tradicional që mbahet në Qytetin e Kumanovës, tash e gjashtë vite me radhë.

Ansambli “GJILANI” disa herë me radhë po merr pjesë në këtë manifestim, duke u munduar që ta pasuroj gjithmonë këtë manifestim me programet tona, krahas shumë Ansambleve dhe grupeve tjera siç ishin: “Ibe Palikuqi”, “Emin Duraku”, “Shqiponja”, “Minatori”, dhe vendësit Bajram Shabani, gjithashtu u paraqiten edhe shumë këngëtare të estradës Shqiptare ka thënë Nehat Ferati kryetar i ansamblit “Gjilani”.

Ansambli i Këngëve dhe Valleve “GJILANI” në këtë manifestim u paraqit me këngë, valle koreografike dhe valle burimore tradicionale, të përgatitura nga këshilli artistik i Ansamblit.

Vlen të theksohet se ky manifestim, nisur nga deklarimet e organizatorëve nga viti i ardhshëm do të shndërrohet në një Festival mbarë kombëtar.

Këto organizime janë shumë të qëlluara dhe të domosdoshme për kultivimin e vlerave artistike kombëtarë, njohjen dhe lidhjen sa më shumë të rinjve tanë ka thënë Ferati./rajonipress/