Anesteziologët gjilanas për herë të parë kryejnë një intervenim në regjion të toraksit

Gjilan – Anesteziologët e Gjilanit Selami Kurteshi, Arsim Emini dhe Ukshin Ismajli për herë të parë në nivel regjional kanë vendosur kateterin epidural në regjion të toraksit. Ky intervenim ka rezultuar i suksesshëm meqë pacienti tani ndihet mirë dhe ka pasur sukses tha për rajonipress Selami Kurteshi.

Në spitalin e Gjilanit është shënuar edhe një sukses nga mjekët e këtushëm. Kësaj radhe janë pikërisht anesteziologët e këtij spitali që kanë arritur për herë të parë në nivel regjional të vendosin kateterin epidural në regjionin e toraksit.

Abdylatif Latifi drejtor i spitalit tha për rajonipress se intervenimi i anesteziologëve ka rezultuar i suksesshëm. “Është e rëndësishme sepse pos që është kryer për herë të parë ky lloj intervenimi është një risi për spitalin e Gjilanit dhe shumë e dobishme për pacientët me sëmundje të rëndë. Ky intervenim është bërë si rezultat i trajnimit të dy anesteziologëve gjilanas në Gjermani” tha Latifi.

Kurse Selami Kurteshi pjesëmarrës i intervenimit tha se intervenimi është kryer tek një pacient shqiptarë dhe e tërë procedura në këtë rast ka shkuar mirë kurse pacienti tani nuk ka dhimbje dhe ndihet më mirë.

Kurteshi tha se tani ekipi i anesteziologëve të Gjilanit po bënë përpjekje që në të ardhmen të kryej intervenime pa pasur dhimbje gjatë lindjes.

Kurteshi tha se tashmë në spitalin e Gjilanit praktikohet edhe vendosja e kateterit për personat që janë në hemodializë.”Më herët këta pacientë kanë shkuar në Prishtinë kurse tani i njëjti shërbim – intervenim kryhet në Gjilan” tha ai.

Kurteshi thotë se këto intervenime tregojnë ngritjen profesionale të kuadrit në spitalin e Gjilanit dhe po tregohet një përkushtim edhe më i madh për të lehtësuar pacientët./rajonipress/