Amir Rrahmani përfshihet në formacionin e sezonit në Serie A

Amir Rrahmani e pati një sezon fantastik në fanellën e Napolit, me të cilin luftoi për titull të kampionit të Italisë deri në pjesën e fundit të sezonit.

Futbollisti kosovar shkëlqeu nën drejtimin e trajnerit Luciano Spalletti duke u bërë njëri prej mbrojtësve më stabilë në Serie A.

Dhe, paraqitjet bravuroze ish-futbollistit të Dinamo Zagrebit e Veronës iu shpërblyen së fundmi.

Në fakt, Qendra Ndërkombëtare e Studimeve në Sport (CIES) e ka përfshirë përfaqësuesin kosovar në Top 11 të sezonit në kampionatin italian të futbollit.

CIES e analizon paraqitjen e lojtarëve në ligat më të rëndësishme të kontinentit, përfshirë këtu edhe atë Serie A.

Rrahmani ishte praktikisht gjithmonë titullar i trajnerit Spalletti, ndërsa e ka konsideruar si pozitiv këtë sezon për ekipin e tij, pavarësisht se mbeti prapa në garë për titull, por që e siguroi pjesëmarrjen në Ligën e Kampionëve për sezonin e ardhshëm.