Amerikanët kthehen në AKP, vetëm me njerëz profesionist

Dorëheqja e kryetarit të Agjencionit Kosovar të Privatizimit – Blerim Rexhës, nuk është akt i mjaftueshëm për të kthyer përfaqësuesen e Ambasadës Amerikane në Bordin e këtij institucioni.

Sipas burimeve të Express brenda Qeverisë, drejtuesit e Ambasadës së Amerikës, do të kthehen në AKP, vetëm atëherë kur institucionet kosovare do të dërgojnë njerëz kompetentë dhe profesionistë në këtë agjenci.

Ambasada Amerikës, për këtë arsye edhe nuk e ka kthyer ende zyrtaren e saj në Bordin e AKP’së.

Gjithashtu, Express ka marrë vesh se Ambasada Amerikane tashmë ka njoftuar Qeverinë e Kosovës se nuk do të jetë pjesë e AKP’së deri në emërimin e shefit të ri në këtë institucion.

“Edhe pse Blerim Rexha ka dhënë dorëheqje, zyrtar të Ambasadës Amerikane kanë thënë se nuk do të dërgojnë përfaqësuesin e tyre deri atëherë kur në këtë institucion emërohen njerëz profesionist dhe kompetent për drejtimin e procesit të privatizimit”, kanë treguar burime të Express.

Zyrtarja amerikane Bernadette Roberts, u tërhoq nga Bordi i drejtorëve të AKP’së, pas vërejtjeve të kësaj Ambasadës Amerikane në kryetarin e Bordit të AKP’së Blerim Rexhës.

Qeveria e Kosovës, së shpejti do të dërgojë për miratim në Kuvendin e Kosovës, emrat për drejtor të Bordit AKP’së.